🔘 *अतिवृष्टीग्रस्त शेतकऱ्यांना दिलासा जळगाव जिल्ह्यासाठी तब्बल ३०० कोटीचे अनुदान* – *पालकमंत्री गुलाबराव पाटील* *जळगाव ३.२५ लाख* *शेतकऱ्यांना मिळणार ३०० कोटींचा दिलासा* 🔘

*अतिवृष्टीग्रस्त शेतकऱ्यांना दिलासा -जळगाव जिल्ह्यासाठी तब्बल ३०० कोटींचे अनुदान – पालकमंत्री गुलाबराव पाटील*

मुंबई / पाळधी/जळगाव | १८ ऑक्टोबर २०२५ राज्यात सप्टेंबर महिन्यात झालेल्या अतिवृष्टी, पूर आणि ढगफुटीमुळे शेतकऱ्यांचे मोठे नुकसान झाले होते. या नुकसानीचा सखोल आढावा घेत शासनाने राज्यातील पाच विभागांतील प्रभावित शेतकऱ्यांसाठी एकूण ३२५८५६.४७ लाख रुपये (३,००० कोटींपेक्षा अधिक) इतक्या मोठ्या अनुदानाला मंजुरी दिली आहे. त्यात जळगाव जिल्ह्याला तब्बल ३०० कोटी रुपयांचा निधी मंजूर करण्यात आला आहे.

महसूल व वन विभागाने यासंदर्भात १८ ऑक्टोबर २०२५ रोजी शासन निर्णय काढला असून, हा निधी राज्य आपत्ती प्रतिसाद निधीतून (SDRF) वितरीत केला जाणार आहे. या निर्णयामुळे अतिवृष्टी आणि ढगफुटीने बाधित शेतकऱ्यांना आर्थिक दिलासा मिळणार आहे.

*जळगाव जिल्ह्यात सप्टेंबर महिन्यात झालेल्या अतिवृष्टी आणि ढगफुटीने हजारो शेतकऱ्यांचे मोठे नुकसान झाले होते. शासनाच्या पातळीवर सातत्याने पाठपुरावा करून अखेर जळगाव जिल्ह्यासाठी ३०० कोटी रुपयांचे अनुदान मंजूर झाले आहे. हा निधी DBT पोर्टलमार्फत थेट शेतकऱ्यांच्या खात्यात जमा होणार असून, प्रत्येक पात्र शेतकऱ्याला शासनाच्या निर्धारित निकषांनुसार मदत मिळेल. या निर्णयामुळे शेतकऱ्यांना दिवाळीपूर्वी दिलासा मिळणार आहे. जिल्ह्यातील सर्व मंत्री, आमदार, खासदार व लोकप्रतिनिधी आणि अधिकारी यांच्या समन्वयातून हे शक्य झाले आहे. शासनाने संकटाच्या काळात शेतकऱ्यांच्या पाठीशी खंबीरपणे उभे राहण्याचा निर्धार केला आहे,” असे पालकमंत्री तथा पाणीपुरवठा व स्वच्छता मंत्री गुलाबराव पाटील यांनी सांगितले.*

*जळगाव जिल्ह्यातील ३.२५ लाख शेतकऱ्यांना मिळणार ३०० कोटींचा दिलासा*
सप्टेंबर महिन्यात झालेल्या अतिवृष्टी आणि ढगफुटीमुळे जळगाव जिल्ह्यात तब्बल ३ लाख २५ हजार ३५९ शेतकऱ्यांचे सुमारे २ लाख ४७ हजार हेक्टर शेतीक्षेत्राचे मोठे नुकसान झाले होते. या नुकसानीची दखल घेत महसूल व पुनर्वसन विभागाने नुकताच शासन निर्णय जारी करत जळगाव जिल्ह्यासाठी २९९.९४ कोटी रुपयांचा अनुदान निधी मंजूर केला आहे. हा निधी राज्य आपत्ती प्रतिसाद निधीतून (SDRF) वितरीत होणार असून, DBT पोर्टलमार्फत थेट शेतकऱ्यांच्या बँक खात्यात जमा केला जाणार आहे. या निर्णयामुळे जिल्ह्यातील अतिवृष्टीग्रस्त शेतकऱ्यांना मोठा दिलासा मिळणार असून, त्यांच्या दिवाळीपूर्वी आर्थिक हातभार मिळेल.

*थेट बँक खात्यात मदत*
शासनाने या अनुदानाची अंमलबजावणी थेट बँक खात्यात (Direct Benefit Transfer – DBT) पद्धतीने करण्याचे आदेश दिले आहेत. संबंधित जिल्हाधिकारी लाभार्थ्यांची नावे, क्षेत्रफळ आणि नुकसान तपशील डिजिटल प्रणालीवर अपलोड करून निधी वितरणाची प्रक्रिया पार पाडणार आहेत.