🔥*विज्ञान प्रदर्शन म्हणजे उद्याच्या प्रगत भारताची पायाभरणी – पालकमंत्री गुलाबराव पाटील* 🔥 *शिरसोली येथे तालुकास्तरीय* *विज्ञान प्रदर्शन उत्साहात संपन्न* *५३ व्या तालुकास्तरीय विज्ञान प्रदर्शनाचे उद्घाटन*

*विज्ञान प्रदर्शन म्हणजे उद्याच्या प्रगत भारताची पायाभरणी – पालकमंत्री गुलाबराव पाटील*

शिरसोली येथे तालुकास्तरीय विज्ञान प्रदर्शन उत्साहात संपन्न

*शिरसोली प्र. बो./ जळगाव प्रतिनिधी | दि. १५ डिसेंबर – विज्ञान म्हणजे केवळ प्रयोगशाळा किंवा महागडी उपकरणे नसून प्रश्न विचारण्याची सवय, जिज्ञासा आणि चिकाटी म्हणजेच खरे विज्ञान असल्याचे प्रतिपादन पालकमंत्री ना. गुलाबराव पाटील यांनी केले. शिरसोली येथे आयोजित ५३ व्या तालुकास्तरीय विज्ञान प्रदर्शनाच्या उद्घाटनप्रसंगी बोलताना त्यांनी विज्ञान प्रदर्शनातील विद्यार्थ्यांचे प्रयोग हे खेळणी नसून उद्याच्या प्रगत भारताची पायाभरणी असल्याचे सांगत, आजच्या विद्यार्थ्यांमध्येच उद्याचे सी. व्ही. रमण आणि डॉ. ए.पी.जे. अब्दुल कलाम दडलेले आहेत, विद्यार्थ्यांनी “मला जमणार नाही” किंवा “हे माझ्याने होणार नाही” हा विचार मनातून काढून टाकावा. प्रयत्न करणाऱ्याची कधीच हार होत नाही असा विश्वास व्यक्त केला. विद्यार्थ्यांनी सतत प्रश्न विचारत कल्पकता आणि जिद्द कायम ठेवावी, अपयशाने खचू नये, तसेच त्यांच्या शैक्षणिक प्रगतीसाठी आमदार, मंत्री आणि भाऊ म्हणून आपण नेहमी त्यांच्या पाठीशी खंबीरपणे उभे असल्याची ग्वाहीही त्यांनी यावेळी दिली. ते शिरसोली येथे आयोजित ५३ व्या तालुकास्तरीय विज्ञान प्रदर्शनाच्या उद्घाटनप्रसंगी बोलत होते.*

या विज्ञान प्रदर्शनाचे आयोजन अत्यंत सुंदर व शिस्तबद्ध पद्धतीने केल्याबद्दल पालकमंत्री गुलाबराव पाटील यांनी आयोजक, शिक्षक आणि विद्यार्थ्यांचे अभिनंदन केले. तालुक्यातील शाळांमधील विद्यार्थ्यांमध्ये वैज्ञानिक दृष्टिकोन, संशोधनवृत्ती व नवकल्पनांना चालना देणारे ५३ वे तालुकास्तरीय विज्ञान प्रदर्शन मोठ्या उत्साहात पार पडले. विद्यार्थ्यांनी सादर केलेल्या प्रयोगांना उत्स्फूर्त प्रतिसाद मिळाला.

कार्यक्रमाच्या प्रास्ताविकात शाळेच्या मुख्याध्यापिका कल्पना पाटील यांनी विज्ञान प्रदर्शनाचा उद्देश स्पष्ट करत विद्यार्थ्यांमध्ये संशोधनवृत्ती, नवकल्पना तसेच शाश्वत विकासाबाबत जागरूकता निर्माण करणे ही काळाची गरज असल्याचे नमूद केले.

कार्यक्रमाचे सूत्रसंचालन उपशिक्षक सुशील पवार यांनी केले, तर आभार गटशिक्षणाधिकारी अजित तडवी व विस्तार अधिकारी विजय पवार यांनी मानले.

*१५५ प्रयोगांची प्रभावी मांडणी*
या विज्ञान प्रदर्शनात तालुक्यातून एकूण १५५ विज्ञान साहित्यांची मांडणी करण्यात आली होती. यामध्ये प्राथमिक गटातील ७५, माध्यमिक गटातील ६० तसेच शिक्षक गटातील २० प्रयोगांचा समावेश होता. शाश्वत शेती, कचरा व्यवस्थापन, हरित ऊर्जा, उदयोन्मुख तंत्रज्ञान, आरोग्य व स्वच्छता, जलसंवर्धन व जलव्यवस्थापन या विषयांवरील प्रयोगांनी उपस्थितांचे विशेष लक्ष वेधून घेतले. विज्ञान प्रदर्शनासाठी मुख्याध्यापक संघाचे राजेंद्र खोरखेडे व तालुका विज्ञान समन्वयक गोपाल महाजन यांनी निरीक्षक म्हणून काम पाहिले. तालुक्यातील सर्व केंद्रप्रमुख, गटसाधन केंद्रातील कर्मचारी व शिक्षकांनी विशेष परिश्रम घेतले.

*विज्ञान प्रदर्शनाचा निकाल जाहीर*
तालुकास्तरीय विज्ञान प्रदर्शनाचा निकाल जाहीर करण्यात आला आहे. *पाचवी ते आठवी गटात*- मीनल सोनवणे हिने प्रथम, सोनाली पाटील हिने द्वितीय तर सायली बारी हिने तृतीय क्रमांक पटकावला. *नववी ते बारावी गटात*- मृदुल पाटील प्रथम, पार्थ चौधरी द्वितीय व असलम पठाण तृतीय क्रमांकावर राहिले.

*प्राथमिक शिक्षक (पहिली ते आठवी) गटात*- योगिता गोलाने यांनी प्रथम क्रमांक मिळविला. *माध्यमिक शिक्षक (नववी ते बारावी) गटात*- ए. वाय. फालक यांनी प्रथम क्रमांक पटकावला. प्रयोगशाळा परिचर गटात ऋषिकेश विजय पाटील प्रथम आले.

*आदिवासी शाळा गटात पाचवी ते आठवी गटात*- अंकिता गणेश राठोड हिने प्रथम क्रमांक मिळविला. *दिव्यांग गटात भार्गव पाटील* यांनी प्रथम क्रमांक पटकावला.

*यांची होती उपस्थिती*
कार्यक्रमाला गटविकास अधिकारी चंद्रकांत बोंढरे, सहायक गटविकास अधिकारी सरला पाटील, जिजामाता माध्यमिक विद्यालयाचे अध्यक्ष जगतराव पाटील, चेअरमन प्रमोद पाटील, सरपंच नितीन बुंधे, माजी सभापती नंदू पाटील, तत्कालीन जिल्हा परिषद सदस्य पवन सोनवणे, विस्तार अधिकारी जितेंद्र चिंचोले, विजय पवार, शांताराम कुंभार, शिक्षक सेनेचे जिल्हाध्यक्ष नरेंद्र सपकाळे, ग.स.चे संचालक ज्ञानेश्वर सोनवणे, माजी सरपंच प्रवीण बारी, प्रवीण पाटील, रामकृष्ण काटोले, नंदलाल पाटील, सुनील पाटील, उमेश पाटील यांच्यासह तालुक्यातील शिक्षक, पालक व विद्यार्थी मोठ्या संख्येने उपस्थित होते.