🚰 *जल जीवन मिशन कार्यशाळेत महाराष्ट्राच्या प्रगतीचे कौतुक* 🚰 *JJM कामे वेळेत पूर्ण करण्यासाठी केंद्र निधी लवकर देण्याची मागणी, केंद्रीय मंत्री सी. आर. पाटील यांचा सकारात्मक प्रतिसाद*

*जल जीवन मिशन कार्यशाळेत महाराष्ट्राच्या प्रगतीचे कौतुक*

JJM कामे वेळेत पूर्ण करण्यासाठी केंद्र निधी लवकर देण्याची मागणी, केंद्रीय मंत्री सी. आर. पाटील यांचा सकारात्मक प्रतिसाद

*दिल्ली/मुंबई प्रतिनिधी : २७ जानेवारी २०२६ रोजी राष्ट्रीय जल जीवन मिशनच्या वतीने ग्रामीण पाईपद्वारे पाणीपुरवठा योजनांच्या संचालन व देखभालीबाबत (Operation & Maintenance) धोरणात्मक संवाद कार्यशाळेचे आयोजन करण्यात आले होते. या राष्ट्रीय स्तरावरील कार्यशाळेस सर्व राज्यांचे मंत्री आमंत्रित होते. या बैठकीत महाराष्ट्र शासनाचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री गुलाबराव पाटील यांनी पाणीपुरवठा व स्वच्छता विभागाचे प्रधान सचिव यांच्यासह सहभाग नोंदवला.*

कार्यशाळेदरम्यान गुलाबराव पाटील यांनी राज्यातील जल जीवन मिशनअंतर्गत सुरू असलेल्या ग्रामीण पाईप पाणीपुरवठा योजनांच्या प्रगतीची सविस्तर माहिती दिली. मिशनची उद्दिष्टे गाठण्याच्या दिशेने महाराष्ट्राने लक्षणीय प्रगती केल्याचे त्यांनी नमूद केले. तसेच योजनांची दीर्घकालीन कार्यक्षमता टिकवून ठेवण्यासाठी राष्ट्रीय जल जीवन मिशनच्या सर्व १९ निकषांनुसार राज्यस्तरीय सर्वसमावेशक संचालन व देखभाल (O&M) धोरणाचा मसुदा महाराष्ट्र शासनाने तयार केला असल्याची माहिती त्यांनी दिली.

उर्वरित कामे वेळेत पूर्ण करण्यासाठी तसेच जल जीवन मिशनचे अपेक्षित उद्दिष्ट साध्य करण्यासाठी केंद्र सरकारकडून निधीचा तातडीने व अखंडपणे विमोचन करण्यात यावे, अशी ठोस मागणी मंत्री गुलाबराव पाटील यांनी यावेळी केली.

या मागणीला केंद्रीय जलशक्ती मंत्री ना. सी. आर. पाटील यांनी सकारात्मक प्रतिसाद देत, महाराष्ट्राच्या प्रगतीचे कौतुक केले. राज्याच्या मागणीबाबत लवकरच आवश्यक निधी उपलब्ध करून देण्यासाठी केंद्र सरकारकडून सकारात्मक पावले उचलली जातील, असे त्यांनी स्पष्ट केले.

वेळेत व पुरेशा प्रमाणात निधी उपलब्ध झाल्यास ग्रामीण भागातील पाणीपुरवठा योजनांची पूर्णता, सातत्यपूर्ण कार्यक्षमता आणि सेवा गुणवत्तेची खात्री होईल, तसेच जल जीवन मिशनच्या उद्दिष्टांची प्रभावी अंमलबजावणी होईल, असा विश्वास यावेळी व्यक्त करण्यात आला. यावेळी प्रधान सचिव पराग जैन हे देखील उपस्थित होते.