🔘*पाळधी येथे उपमुख्यमंत्री अजितदादा पवार यांना सर्वपक्षीय भावपूर्ण श्रद्धांजली*🔘

पाळधी येथे उपमुख्यमंत्री अजितदादा पवार यांना सर्वपक्षीय भावपूर्ण श्रद्धांजली
पाळधी (ता. धरणगाव) | प्रतिनिधी :
पाळधी येथे जीपीएस मित्रपरिवाराच्या पुढाकाराने महाराष्ट्र राज्याचे उपमुख्यमंत्री अजितदादा पवार यांना सर्वपक्षीय भावपूर्ण श्रद्धांजली अर्पण करण्यात आली. या श्रद्धांजली सभेस सर्व राजकीय पक्षांचे पदाधिकारी, लोकप्रतिनिधी, सामाजिक कार्यकर्ते तसेच नागरिक मोठ्या संख्येने उपस्थित होते. सर्वपक्षीय ऐक्याचे दर्शन या सभेत घडले.
श्रद्धांजली सभेप्रसंगी जिल्हा परिषद सदस्य प्रतापराव पाटील यांनी अजितदादा पवार यांच्या कार्याचा आणि कार्यपद्धतीचा सविस्तर आढावा घेतला. कठोर शिस्त, निर्णयक्षम नेतृत्व, प्रशासनावर असलेली पकड आणि सामान्य जनतेसाठी झटणारा नेता म्हणून अजितदादा पवार यांची ओळख असल्याचे त्यांनी नमूद केले. त्यांच्या राजकीय जीवनातील काही आठवणी व किस्से सांगत अजितदादांचे नेतृत्व राज्यासाठी किती महत्त्वाचे होते, हे त्यांनी भावनिक शब्दांत मांडले.
यावेळी माजी सभापती मुकुंदराव नन्नवरे यांनी अजितदादा पवार हे केवळ पक्षाचे नव्हे तर संपूर्ण राज्याचे नेतृत्व करणारे व्यक्तिमत्त्व होते, असे सांगत त्यांच्या कार्यकर्तृत्वाचा गौरव केला. माजी सभापती सचिनदादा पवार यांनी विकासाभिमुख दृष्टिकोन, जलसंधारण, कृषी व सहकार क्षेत्रातील योगदान यांचा विशेष उल्लेख केला.
शिवसेना विधानसभा क्षेत्र प्रमुख संजय पाटील सर यांनी बोलताना अजितदादा पवार यांचे प्रशासनावर असलेले प्रभुत्व आणि वेळेवर निर्णय घेण्याची शैली अधोरेखित केली. राष्ट्रीय काँग्रेसचे तालुकाध्यक्ष डॉ. व्ही. डी. पाटील यांनी सामाजिक न्याय, सर्वसामान्यांच्या प्रश्नांबाबत अजितदादांची असलेली तळमळ यावर प्रकाश टाकला. भाजप शहराध्यक्ष संदेश झंवर यांनी सांगीतले की अजितदादा पवार यांच्या कार्यक्षमतेबद्दल सर्वांनाच आदर होता, असे सांगितले.
राष्ट्रवादी काँग्रेस पार्टी सामाजिक न्याय विभागाचे जिल्हाध्यक्ष यांनी देखील आपल्या शोकभावना व्यक्त करत अजितदादा पवार यांच्या जाण्याने राज्याच्या राजकारणात निर्माण झालेली पोकळी भरून न येणारी असल्याची भावना व्यक्त केली.
या श्रद्धांजली सभेचे सूत्रसंचालन भूषण महाजन यांनी अत्यंत संयत व भावपूर्ण शब्दांत केले. सभेच्या शेवटी उपस्थित सर्वांनी दोन मिनिटांचे मौन पाळून अजितदादा पवार यांच्या आत्म्यास शांती लाभो, अशी सामूहिक प्रार्थना केली.
संपूर्ण शोकाकुल वातावरण असून, अजितदादा पवार यांचे कार्य, नेतृत्व आणि आठवणी कायम प्रेरणादायी राहतील, अशी भावना सर्व उपस्थितांनी व्यक्त केली.