🪢*तरुणांनी नोकरीच्या मागे न लागता उद्योजकतेकडे वळावे – मा. जिल्हा परिषद सदस्य प्रतापराव पाटील*🪢 पाळधी येथे तरुण उद्योजकांसाठी भव्य मार्गदर्शन मेळावा संपन्न मेळाव्यात PMEGP व CMEGP योजनांतर्गत सचिन ज्ञानेश्वर पाटील व उमेश अरुण नंदनवार यांना प्रत्येकी ५० लाख रुपयांच्या कर्ज मंजुरीची पत्रे मान्यवरांच्या हस्ते प्रदान करण्यात आली.

*तरुणांनी नोकरीच्या मागे न लागता उद्योजकतेकडे वळावे – मा. जिल्हा परिषद सदस्य प्रतापराव पाटील*

पाळधी येथे तरुण उद्योजकांसाठी भव्य मार्गदर्शन मेळावा संपन्न

*पाळधी / जळगाव (प्रतिनिधी) दि. ५ फेब्रुवारी : तरुणांनी नोकरीच्या मागे न लागता उद्योजकतेकडे वळावे. शासनाच्या विविध योजनांचा लाभ घेऊन स्वतःचा व्यवसाय उभारावा. बाळासाहेब ठाकरे यांच्या विचारानुसार मराठी माणूस हा नोकरी मागणारा नाही, तर नोकरी देणारा झाला पाहिजे, असे प्रेरणादायी प्रतिपादन माजी जिल्हा परिषद सदस्य प्रतापराव पाटील यांनी केले. पालकमंत्री गुलाबराव पाटील यांच्या मार्गदर्शनाखाली पाळधी येथील शासकीय विश्रामगृह येथे GPS मित्र परिवाराच्या वतीने भव्य रोजगार व उद्योग मार्गदर्शन मेळाव्याचे आयोजन करण्यात आले होते. कार्यक्रमाच्या अध्यक्षस्थानी जिल्हा उद्योग केंद्राचे महाव्यवस्थापक संतोष गवळी होते.*

मार्गदर्शन करताना महाराष्ट्र बँकेचे विभागीय व्यवस्थापक प्रविण सिन्हा यांनी, “बँका सकारात्मक भूमिकेतून कर्ज प्रकरणे मंजूर करतात. आर्थिक क्षमतेनुसार व्यवसाय निवडावा.असे मत व्यक्त केले. जिल्हा उद्योग केंद्राचे महाव्यवस्थापक संतोष गवळी यांनी, “GPS मित्रपरिवार हे उद्योग-व्यवसायासाठी खरे व्यासपीठ आहे. उद्योजक व्हायचे असेल तर सकारात्मक दृष्टिकोन ठेवा. व्यवसायाचा आत्मा म्हणजे चांगला प्रोजेक्ट,” असे सांगितले. पशुसंवर्धन विभागाचे सहायक आयुक्त श्यामकांत हिरे यांनी, “नोकरीपेक्षा पशुपालन व्यवसाय अधिक फायदेशीर ठरतो. योग्य वेळी पशूंची काळजी घेतली तर उत्पन्न निश्चित वाढते,” असे सांगितले. जिल्हा कृषी अधीक्षक कुर्बान तडवी यांनी, “शेतीला पूरक आणि दैनंदिन गरजेवर आधारित उद्योग निवडून ठाम निश्चयाने व्यवसायात उतरावे,” असे आवाहन केले.

बँक प्रतिनिधी गजभिये यांनी, “व्यवसायाची भरभराट करायची असेल तर वेळेवर परतफेड करून बँकेत पत निर्माण करा. विमा काढणेही आवश्यक आहे,” असे सांगितले तर महाराष्ट्र संशोधन उन्नती व प्रशिक्षण प्रबोधिनी (अमृत), पुणेचे राजेंद्र कानडे यांनी, “उद्योजकतेसाठी चिकाटी व परिश्रम आवश्यक आहेत. अमृत संस्थेमार्फत विविध उद्योगांचे प्रशिक्षण तसेच कर्जावरील व्याज परताव्याचा लाभ दिला जातो,” अशी माहिती दिली.

मेळाव्यात PMEGP व CMEGP या सरकारी कर्ज योजनांतर्गत कर्ज कसे घ्यावे, जिल्हा उद्योग केंद्राकडून मिळणारे अनुदान, अण्णासाहेब पाटील महामंडळ, इतर मागासवर्गीय महामंडळ व ‘अमृत’ योजनेंतर्गत मिळणारे लाभ, बँकेत कर्ज प्रकरण सादर करताना लागणारी कागदपत्रे, बँकांची कार्यपद्धती तसेच सध्याच्या काळात कोणते व्यवसाय अधिक फायदेशीर ठरू शकतात, याबाबत सविस्तर मार्गदर्शन करण्यात आले.

माजी सभापती व उद्योजक राजेंद्र चव्हाण व माजी जिल्हा परिषद सदस्य तथा उद्योजक गोपाल चौधरी यांनी, “व्यवसाय करताना लाज बाळगू नका. राजकारणासोबत व्यवसायाकडे लक्ष दिल्यास आर्थिक बळकटी मिळते,” असे अनुभव कथन केले.

*मेळाव्यात PMEGP व CMEGP योजनांतर्गत सचिन ज्ञानेश्वर पाटील व उमेश अरुण नंदनवार यांना प्रत्येकी ५० लाख रुपयांच्या कर्ज मंजुरीची पत्रे मान्यवरांच्या हस्ते प्रदान करण्यात आली.*

*उपस्थित मान्यवर*
या मेळाव्यास जिल्हा उद्योग केंद्राचे महाव्यवस्थापक संतोष गवळी, सेंट्रल बँकेचे लीड बँक मॅनेजर श्री. डोहरे, महाराष्ट्र बँकेचे विभागीय व्यवस्थापक प्रविणसिंह, बँक ऑफ बडोदाचे शाखा व्यवस्थापक सुनील देशमुख, स्टेट बँक ऑफ इंडियाचे जिल्हा व्यवस्थापक संतोष दराडे, अण्णासाहेब पाटील महामंडळाचे जिल्हा समन्वयक दीपक बोरसे, महाराष्ट्र संशोधन उन्नती व प्रशिक्षण प्रबोधिनी (अमृत), पुणेचे राजेंद्र कानडे, जिल्हा उद्योग केंद्राचे आर. आर. डोंगरे, इतर मागासवर्गीय महामंडळाचे जिल्हा व्यवस्थापक योगेश पाटील, जिल्हा कृषी अधीक्षक कुर्बान तडवी, पशुसंवर्धन विभागाचे सहायक आयुक्त श्यामकांत हिरे, माजी सभापती मुकुंदराव नन्नवरे, बँक ऑफ बडोद्याचे राहुल गीते, माजी सभापती व उद्योजक राजेंद्र चव्हाण, माजी जिल्हा परिषद सदस्य तथा उद्योजक गोपाल चौधरी, महानगर प्रमुख संतोष पाटील यांच्यासह शिवसेना-युवासेनेचे पदाधिकारी व आजी-माजी लोकप्रतिनिधी, GPS मित्र परिवाराचे सदस्य तसेच युवक व महिला बचत गटाचे महिला पदाधिकारी मोठ्या संख्येने उपस्थित होते.

कार्यक्रमाचे सूत्रसंचालन भूषण माळी यांनी केले. प्रास्ताविक जिल्हा समन्वयक समीर भाटिया यांनी केले. आभार उद्योजक तथा GPS ग्रुपचे विक्रम पाटील यांनी मानले.