🔥*दुपारी बाहेर पडू नका; उन्हाशी खेळ जीवावर बेतू शकतो – पालकमंत्री गुलाबराव पाटील यांचे नागरिकांना थेट आवाहन*🔥

*दुपारी बाहेर पडू नका; उन्हाशी खेळ जीवावर बेतू शकतो – पालकमंत्री गुलाबराव पाटील यांचे नागरिकांना थेट आवाहन*

*पाळधी/धरणगाव/जळगाव, प्रतिनिधी (दि. १७ एप्रिल) – जिल्ह्यात वाढत्या तापमानामुळे उष्माघाताचा धोका गंभीर बनत चालला असून नागरिकांनी स्वतःची व कुटुंबाची विशेष काळजी घ्यावी, उन्हाशी खेळ करू नका; सावधगिरीच हा सर्वोत्तम उपाय आहे. स्वतःची काळजी घ्या, कुटुंबाची काळजी घ्या… उन्हाळा काही दिवसांचा असतो, पण आपला जीव अमूल्य आहे,” असे भावनिक शब्दांत पालकमंत्री गुलाबराव पाटील यांनी नागरिकांना थेट सतर्क राहण्याचे आवाहन केले.*

सध्या उन्हाचा पारा धोकादायक पातळीवर पोहोचत असून दुपारी १२ ते ४ या वेळेत सूर्यप्रकाश अत्यंत तीव्र असतो. या काळात शक्यतो घराबाहेर पडणे टाळावे, असे सांगण्यात आले आहे. ग्रामीण भागातील शेतकरी बांधवांनी दुपारच्या वेळेत शेतातील कामे टाळावीत, जनावरांसाठी सावली व पुरेसे पाणी उपलब्ध करून द्यावे, तसेच ग्रामपंचायतींनी दवंडी करून नागरिकांमध्ये जनजागृती करावी, असे आवाहनही पालकमंत्री गुलाबराव पाटील यांनी केले.

अत्यावश्यक काम असल्यासच बाहेर पडावे व बाहेर जाताना डोक्यावर टोपी किंवा कापड वापरणे, हलके व सैल कपडे परिधान करणे तसेच पाण्याची बाटली सोबत ठेवणे आवश्यक असल्याचे सांगण्यात आले. शहरी भागातील नागरिकांनी अनावश्यक बाहेर पडणे टाळून कामांचे नियोजन सकाळ किंवा सायंकाळच्या वेळेत करावे. बांधकाम साईट, दुकाने व कार्यालयांमध्ये पिण्याच्या पाण्याची व्यवस्था अनिवार्य ठेवावी, तसेच रस्त्यावर काम करणाऱ्या मजुरांनी नियमित विश्रांती घ्यावी, असे निर्देश संबंधित विभागांना देण्यात आले आहेत.

उष्माघाताची लक्षणे जसे की डोकेदुखी, चक्कर येणे, अशक्तपणा, मळमळ किंवा जास्त घाम येणे याकडे दुर्लक्ष करू नये. अशी लक्षणे जाणवल्यास त्वरित सावलीत विश्रांती घ्यावी व आवश्यक असल्यास जवळच्या आरोग्य केंद्राशी संपर्क साधावा, असे प्रशासनाने स्पष्ट केले आहे. दरम्यान, पालकमंत्र्यांच्या सूचनेनुसार जिल्ह्यातील सर्व शासकीय रुग्णालयांमध्ये उष्माघात कक्ष सज्ज ठेवण्यात आले असून आरोग्य विभागाला तातडीच्या सेवांसाठी सतर्क राहण्याचे निर्देश देण्यात आले असून शहरी व ग्रामीण भागात जनजागृती मोहीम राबवून नागरिकांपर्यंत आवश्यक माहिती पोहोचवली जात आहे.