🚆*पाळधी रेल्वे स्थानकावर महत्त्वाच्या गाड्यांना थांबा द्यावा; प्रतापराव पाटील यांचे रेल्वे प्रशासनाकडे निवेदन*🚆 “जीएम रामाश्रय पांडे व डीआरएम पंकज सिंह यांच्याशी प्रत्यक्ष चर्चा; स्थानिक प्रवाशांच्या सुविधेसाठी पाठपुरावा

*पाळधी रेल्वे स्थानकावर महत्त्वाच्या गाड्यांना थांबा द्यावा; प्रतापराव पाटील यांचे रेल्वे प्रशासनाकडे निवेदन*

“जीएम रामाश्रय पांडे व डीआरएम पंकज सिंह यांच्याशी प्रत्यक्ष चर्चा; स्थानिक प्रवाशांच्या सुविधेसाठी पाठपुरावा”

*पाळधी, प्रतिनिधी दिनांक 27 मे : धरणगाव तालुक्यातील पाळधी रेल्वे स्थानकावर महत्त्वाच्या प्रवासी गाड्यांना अधिकृत थांबा देण्यात यावा, अशी मागणी युवा नेते तथा तत्कालीन जिल्हा परिषद सदस्य प्रतापराव गुलाबराव पाटील यांनी रेल्वे प्रशासनाकडे केली आहे. पाळधी रेल्वे स्थानकाच्या दौऱ्यावर आलेले मध्य रेल्वेचे महाव्यवस्थापक (जीएम) रामाश्रय पांडे आणि भुसावळ विभागाचे विभागीय रेल्वे व्यवस्थापक (डीआरएम) पंकज सिंह यांची प्रत्यक्ष भेट घेऊन त्यांनी निवेदन सादर करत विविध मुद्द्यांवर सविस्तर चर्चा केली.*

निवेदनात नमूद करण्यात आले आहे की, पाळधी हे धरणगाव तालुक्यातील महत्त्वाचे रेल्वे स्थानक असून परिसरातील अनेक गावांतील नागरिक, विद्यार्थी, शेतकरी, व्यापारी, नोकरदार वर्ग तसेच उपचारासाठी प्रवास करणारे रुग्ण मोठ्या प्रमाणात रेल्वे सेवेवर अवलंबून आहेत. मात्र सध्या अनेक महत्त्वाच्या गाड्यांना पाळधी येथे थांबा नसल्यामुळे प्रवाशांना भुसावळ किंवा जळगाव येथे जाऊन रेल्वे पकडावी लागत असून त्यामुळे वेळ, पैसा आणि अतिरिक्त श्रमांचा भार सहन करावा लागत आहे.

विशेषतः विद्यार्थ्यांना शिक्षणासाठी, व्यापाऱ्यांना व्यवसायासाठी, शेतकऱ्यांना कृषी कामांसाठी तसेच रुग्णांना उपचारासाठी मोठ्या अडचणींचा सामना करावा लागत असल्याचे प्रतापराव पाटील यांनी यावेळी सांगितले. परिसरातील वाढती लोकसंख्या, प्रवाशांची संख्या आणि स्थानिक गरज लक्षात घेता काही महत्त्वाच्या गाड्यांना पाळधी रेल्वे स्थानकावर थांबा देणे आवश्यक असल्याचे त्यांनी स्पष्ट केले.

*निवेदनात गाडी क्रमांक १२१११ सूरत–अमरावती एक्सप्रेस, गाडी क्रमांक १९००७ सूरत–भुसावळ एक्सप्रेस तसेच खान्देश एक्सप्रेस (गाडी क्रमांक १९००३) वांद्रा टर्मिनस–भुसावळ या गाड्यांना पाळधी येथे अधिकृत थांबा देण्याची मागणी करण्यात आली आहे.*

*यावेळी प्रतापराव पाटील यांनी स्थानिक नागरिकांच्या रेल्वे प्रवासातील अडचणी, परिसरातील वाढती प्रवासी संख्या आणि भविष्यातील गरज याबाबत दोन्ही वरिष्ठ अधिकाऱ्यांशी सविस्तर चर्चा केली. यावर संबंधित अधिकाऱ्यांनी या मागणीचा सकारात्मक आणि गांभीर्याने विचार केला जाईल, अशी भूमिका व्यक्त केल्याचे सांगण्यात आले.*

प्रतापराव पाटील यांनी सांगितले की, या गाड्यांना थांबा मिळाल्यास हजारो प्रवाशांची मोठी सोय होणार असून विद्यार्थी, व्यापारी, शेतकरी, नोकरदार वर्ग तसेच सर्वसामान्य नागरिकांना मोठा दिलासा मिळेल. याशिवाय रेल्वे स्थानकाच्या विकासाला चालना मिळून परिसरातील आर्थिक आणि व्यापारी प्रगतीलाही मदत होणार आहे.

*यांची होती उपस्थिती*
यावेळी माजी सरपंच अरुण पाटील, प्रशांत झंवर, धनराज कासट, अनिल माळी, दिलीप माळी, राकेश धनगर, योगेश माळी, भूषण महाजन, राहुल बिऱ्हाडे, प्रवीण पाटील, चंदन कळमकर, राहुल चौधरी, मुकेश भोई आणि दीपक कोळी, हर्षल कोळी, योगेश माळी यांच्यासह जीपीएस ग्रुपचे पदाधिकारी उपस्थित होते.