💥*”भगवंताशी नाते जोडल्याशिवाय जीवनाला खरी शांती नाही” – युवाचार्य संतोषजी महाराज आढावणे पाटील*💥 पालकमंत्री गुलाबराव पाटील यांच्या वाढदिवसानिमित्त पाळधीत भव्य कीर्तन महोत्सव; हजारो भाविकांची उत्स्फूर्त उपस्थिती, भक्तिरसात न्हाऊन निघाला परिसर

*”भगवंताशी नाते जोडल्याशिवाय जीवनाला खरी शांती नाही” – युवाचार्य संतोषजी महाराज आढावणे पाटील*

पालकमंत्री गुलाबराव पाटील यांच्या वाढदिवसानिमित्त पाळधीत भव्य कीर्तन महोत्सव; हजारो भाविकांची उत्स्फूर्त उपस्थिती, भक्तिरसात न्हाऊन निघाला परिसर

*पाळधी, ता. धरणगाव (प्रतिनिधी) : “मनुष्य कितीही श्रीमंत, यशस्वी किंवा प्रतिष्ठित झाला तरी त्याच्या जीवनाला खरी शांती, समाधान आणि आनंद हा केवळ भगवंताच्या भक्तीतूनच प्राप्त होतो. देवाशी जोडलेले दृढ नाते हेच जीवनातील सर्वात मोठे बळ असून त्याशिवाय जीवनाला पूर्णत्व प्राप्त होत नाही,” असे प्रतिपादन युवाचार्य ह.भ.प. संतोषजी महाराज आढावणे पाटील यांनी केले.*

राज्याचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री नामदार गुलाबराव पाटील यांच्या अभिष्टचिंतन सोहळ्यानिमित्त जीपीएस परिवार, युवा नेते तथा माजी जिल्हा परिषद सदस्य प्रतापराव पाटील आणि विक्रम पाटील यांच्या नेतृत्वाखाली पाळधी येथे आयोजित भव्य कीर्तन महोत्सवात ते बोलत होते.

*आपल्या ओजस्वी आणि विचारप्रवर्तक कीर्तनातून संतोषजी महाराज यांनी अध्यात्म, संस्कार आणि समाजप्रबोधनाचा संदेश दिला. आजच्या धावपळीच्या, स्पर्धात्मक आणि तणावग्रस्त जीवनशैलीमुळे माणूस भौतिक सुखांच्या मागे धावत असताना मानसिक समाधान हरवत चालल्याची खंत व्यक्त करत त्यांनी भक्तीमार्गाचे महत्त्व अधोरेखित केले.*

*”देवाची प्राप्ती केवळ पूजा-अर्चा, धार्मिक विधी किंवा कर्मकांडातून होत नाही; तर सदाचार, सेवाभाव, संतसंग, नामस्मरण आणि समाजहिताची भावना यांमधून होते,” असे त्यांनी सांगितले.*

यावेळी संत परंपरेतील अभंग, दृष्टांत आणि प्रेरणादायी कथा यांचा संदर्भ देत त्यांनी उपस्थितांना भक्तीचे महत्त्व पटवून दिले.

मोबाईल आणि नेटवर्कचे समर्पक उदाहरण देत ते म्हणाले, “ज्याप्रमाणे मोबाईल सतत नेटवर्कशी जोडलेला असेल तर तो सुरळीत कार्य करतो, त्याचप्रमाणे मनुष्याचे मन सतत भगवंताशी जोडलेले असेल तर जीवनातील कोणतेही संकट पेलण्याची शक्ती त्याला प्राप्त होते.”

कीर्तन महोत्सवाचे विशेष आकर्षण म्हणजे पालकमंत्री गुलाबराव पाटील यांनी नेहमी प्रमाणे इतर भाविकांप्रमाणेच खाली बसून संपूर्ण कीर्तन श्रवण केले.कार्यक्रमाच्या समारोपप्रसंगी नामदार गुलाबराव पाटील यांच्या दीर्घायुष्य, उत्तम आरोग्य आणि समाजसेवेच्या कार्याला अधिक बळ लाभावे, अशी सामूहिक प्रार्थना करण्यात आली. भक्ती, संस्कार आणि समाजप्रबोधनाचा संदेश देणारा हा कीर्तन महोत्सव उपस्थितांच्या स्मरणात दीर्घकाळ राहील, अशी भावना यावेळी व्यक्त करण्यात आली.

कीर्तनादरम्यान टाळ-मृदंगाच्या गजरात हरिनामाचा अखंड जयघोष घुमत राहिला. संतोषजी महाराजांच्या प्रभावी वाणीने आणि भक्तिमय वातावरणाने संपूर्ण परिसर अध्यात्मिक ऊर्जेने भारावून गेला.

समाजहित, संस्कार आणि अध्यात्म यांचा सुंदर संगम अनुभवण्यासाठी हजारो भाविक, वारकरी, महिला, युवक, ग्रामस्थ, विविध क्षेत्रातील मान्यवर आणि लोकप्रतिनिधी मोठ्या संख्येने उपस्थित होते.