💥*महाराणा प्रतापांचा स्वाभिमान आणि जिजाऊंचे संस्कार हा राष्ट्राचा अमूल्य वारसा - पालकमंत्री गुलाबराव पाटील*💥 जीपीएस स्कूल कॅम्पस, पाळधी येथे महाराणा प्रताप जयंती व राष्ट्रमाता जिजाऊ पुण्यतिथीनिमित्त प्रतिमापूजन

*महाराणा प्रतापांचा स्वाभिमान आणि जिजाऊंचे संस्कार हा राष्ट्राचा अमूल्य वारसा – पालकमंत्री गुलाबराव पाटील*

जीपीएस स्कूल कॅम्पस, पाळधी येथे महाराणा प्रताप जयंती व राष्ट्रमाता जिजाऊ पुण्यतिथीनिमित्त प्रतिमापूजन

*पाळधी /धरणगाव/जळगाव दि. १७ : हिंदू सूर्य, वीरशिरोमणी महाराणा प्रताप यांच्या जयंतीनिमित्त तसेच राष्ट्रमाता राजमाता जिजाऊ माँसाहेब यांच्या पुण्यतिथीनिमित्त आज जीपीएस स्कूल कॅम्पस, पाळधी येथे पालकमंत्री तथा पाणीपुरवठा व स्वच्छता मंत्री गुलाबराव पाटील यांच्या हस्ते दोन्ही महान विभूतींच्या प्रतिमांचे पूजन करून पुष्प अर्पण करत अभिवादन करण्यात आले.*

यावेळी बोलताना पालकमंत्री गुलाबराव पाटील म्हणाले की, हिंदू सूर्य महाराणा प्रताप हे शौर्य, स्वाभिमान आणि राष्ट्रनिष्ठेचे प्रतीक होते. संकटे कितीही मोठी असली तरी मातृभूमीच्या रक्षणासाठी त्यांनी कधीही तडजोड केली नाही. त्यांचे जीवन हे संघर्ष, पराक्रम आणि स्वाभिमानाचा जाज्वल्य इतिहास असून आजच्या पिढीने त्यांच्या विचारांतून प्रेरणा घेऊन राष्ट्रहिताला सर्वोच्च प्राधान्य द्यावे. राष्ट्रमाता राजमाता जिजाऊ माँसाहेब यांनी छत्रपती शिवाजी महाराजांना संस्कारांचे बाळकडू देत स्वराज्याच्या उभारणीची भक्कम पायाभरणी केली. त्यांचा त्याग, दूरदृष्टी, कर्तृत्व आणि राष्ट्रनिष्ठा यामुळेच स्वराज्याचे स्वप्न साकार झाले. जिजाऊंचे विचार आणि संस्कार समाजाला दिशा देणारे असून प्रत्येकाने त्यांच्या आदर्शाचे स्मरण ठेवून समाजहितासाठी कार्य केले पाहिजे.

“महाराणा प्रतापांचा स्वाभिमान आणि जिजाऊंचे संस्कार हा आपल्या इतिहासाचा अमूल्य वारसा आहे. या दोन्ही महान विभूतींचे विचार अंगीकारणे हीच त्यांना खरी मानवंदना ठरेल,”असे प्रतिपादन पालकमंत्री गुलाबराव पाटील यांनी केले.

याप्रसंगी शाळेचे चेअरमन विक्रम पाटील, जीपीएस स्कूल कॅम्पसचे समन्वयक डी. डी. कंखरे, कॉलेजचे प्रिन्सिपल अजिंक्य जोशी, नरेंद्र मांडगे, नवलसिंग पाटील, बंडूदादा नारखेडे, शिक्षक, विद्यार्थी तसेच परिसरातील नागरिक उपस्थित होते.

कार्यक्रमाचे सूत्रसंचालन व प्रास्ताविक अजिंक्य जोशी सर यांनी केले, तर आभार जीपीएस स्कूलचे समन्वयक डी. डी. कंखरे यांनी मानले.