🏌️*खेळातून संघभावना, संस्कृतीतून संस्कार आणि आत्मविश्वासातून यश – पालकमंत्री गुलाबराव पाटील*🏌️ जिल्हा परिषद कर्मचाऱ्यांच्या क्रीडा-सांस्कृतिक स्पर्धांचा उत्साहात समारोप

*खेळातून संघभावना, संस्कृतीतून संस्कार आणि आत्मविश्वासातून यश – पालकमंत्री गुलाबराव पाटील*

जिल्हा परिषद कर्मचाऱ्यांच्या क्रीडा-सांस्कृतिक स्पर्धांचा उत्साहात समारोप

*जळगाव (प्रतिनिधी), दि. २८ फेब्रुवारी – स्पर्धेतून जिद्द निर्माण होते, जिद्दीतून आत्मविश्वास आणि आत्मविश्वासातूनच यश प्राप्त होते. जीवनात खेळ आणि स्वगुणांना खूप महत्त्व असते. प्रत्येकाच्या अंगी काही ना काही विशेष गुण असतात. स्वतःतील गुणांची ओळख करून त्या दिशेने मार्गक्रमण केल्यास यशाच्या शिखरावर पोहोचण्यास वेळ लागत नाही,” असे प्रतिपादन जळगाव जिल्ह्याचे पालकमंत्री तथा पाणीपुरवठा व स्वच्छता मंत्री गुलाबराव पाटील यांनी केले.*

जिल्हा परिषद अंतर्गत अधिकारी व कर्मचारी यांच्यासाठी मुख्य कार्यकारी अधिकारी मीनल करणवाल यांच्या मार्गदर्शनाखाली आयोजित क्रीडा स्पर्धा व सांस्कृतिक कार्यक्रमांच्या पारितोषिक वितरण सोहळ्यात ते बोलत होते. शनिवार, दि. २८ फेब्रुवारी रोजी शहरातील ला. ना. शाळेच्या गंधे सभागृहात हा कार्यक्रम उत्साहात पार पडला.

हा सोहळा म्हणजे कष्ट, शिस्त, संघभावना आणि संस्कार यांच्या विजयाचा उत्सव असल्याचे पालकमंत्री गुलाबराव पाटील यांनी नमूद केले. ज्यांना यंदा पारितोषिक मिळाले नाही त्यांनी निराश होऊ नये; क्रिकेटमध्ये एक डाव खराब गेला म्हणून कारकीर्द संपत नाही, पुढील सामना जिंकण्याची जिद्द असली पाहिजे, असे ते म्हणाले. “हे जीवन म्हणजे क्रिकेट राजा, हुकला तो संपला,” या सुनील गावस्कर यांच्या ओळी सादर करत त्यांनी उपस्थितांची मने जिंकली.

आपल्या वैयक्तिक अनुभवाचा उल्लेख करताना पाटील म्हणाले, “मी लकी क्रिकेट टीमचा कर्णधार होतो. नाट्यक्षेत्रात राज्यात प्रथम क्रमांक मिळाल्यानंतर माझ्या राजकीय वाटचालीला सुरुवात झाली. खेळ आणि कलेतून मिळालेला आत्मविश्वास पुढील प्रवासात उपयोगी पडला.”

खेळातून मिळालेली जिद्द आणि संस्कृतीतून मिळालेले संस्कार प्रशासनातील जबाबदारी पार पाडताना उपयुक्त ठरतात. जळगाव जिल्हा राज्यात आदर्श ठरण्यासाठी नियोजनबद्ध व संघभावनेने काम करण्याचे आवाहन त्यांनी केले.

कार्यक्रमाच्या यशस्वी आयोजनाबद्दल मुख्य कार्यकारी अधिकारी व त्यांच्या टीमचे अभिनंदन करून पारितोषिक विजेत्यांचे त्यांनी कौतुक केले.

कार्यक्रमात दोन दिवस चाललेल्या विविध क्रीडा स्पर्धांमधील विजेत्यांचा पालकमंत्र्यांच्या हस्ते सन्मान करण्यात आला. यावर्षी क्रिकेट (पुरुष व महिला), व्हॉलीबॉल, फुटबॉल, रस्सीखेच, बॅडमिंटन, बुद्धिबळ तसेच धावण्याच्या स्पर्धांचा समावेश होता. शनिवारी सकाळी क्रिकेट स्पर्धेच्या उपांत्य आणि अंतिम फेऱ्या रंगल्या.

अंतिम क्रिकेट सामना एरंडोल व पाचोरा संघामध्ये अत्यंत रंगतदार झाला. या सामन्यात एरंडोल संघाने दणदणीत विजय संपादन करत विजेतेपद पटकावले, तर पाचोरा संघ उपविजेता ठरला. स्पर्धांची सुरुवात दि. २६ फेब्रुवारी रोजी कवयित्री बहिणाबाई चौधरी उत्तर महाराष्ट्र विद्यापीठाच्या मैदानावर झाली होती.

या वेळी मुख्य कार्यकारी अधिकारी मीनल करणवाल, अतिरिक्त मुख्य कार्यकारी अधिकारी रणधीर सोमवंशी, जिल्हा ग्रामीण विकास यंत्रणेचे प्रकल्प संचालक आर. एस. लोखंडे, उपमुख्य कार्यकारी अधिकारी मनोज चौधरी, प्राथमिक शिक्षणाधिकारी निलेश पाटील, माध्यमिक शिक्षणाधिकारी कल्पना चव्हाण, सिंचन विभागाचे कार्यकारी अभियंता अमोल पाटील, ग्रामीण पाणीपुरवठा विभागाचे कार्यकारी अभियंता राहुल जाधव यांच्यासह सर्व गटविकास अधिकारी, विभागप्रमुख व कर्मचारी मोठ्या संख्येने उपस्थित होते.

कार्यक्रमाचे बहारदार सूत्रसंचालन उपशिक्षक रवींद्र पाटील यांनी केले. प्रास्ताविक सा.प्र.वी.चे उपमुख्य कार्यकारी अधिकारी मनोज चौधरी यांनी केले तर आभार प्राथमिक शिक्षणाधिकारी निलेश पाटील यांनी मानले.

लोकसंस्कृतीचा जागर
क्रीडा स्पर्धांसह आयोजित करण्यात आलेल्या सांस्कृतिक कार्यक्रमात कर्मचाऱ्यांनी विविध गीते, पारंपरिक नृत्य व लोकनृत्य सादर करून लोककलेचा समृद्ध वारसा उलगडला.

विशेषतः एरंडोल तालुक्यातील ‘कानबाई’ नृत्याने उपस्थितांची मने जिंकली. सांस्कृतिक कार्यक्रमातून लोकसंस्कृतीचा जागर घडवून आणण्यात आला.

जिल्हा परिषदेमार्फत दरवर्षी तालुका व जिल्हास्तरावर क्रीडा स्पर्धा व सांस्कृतिक कार्यक्रमांचे आयोजन करण्यात येते. दैनंदिन शासकीय कामकाजातील ताणतणावातून विरंगुळा मिळावा व अधिकारी-कर्मचाऱ्यांमध्ये संघभावना दृढ व्हावी, हा या उपक्रमामागील मुख्य उद्देश आहे.