💥*‘समाधान शिबिर’ ठरतेय जनतेसाठी दिलासादायी उपक्रम – पालकमंत्री गुलाबराव पाटील*💥 ८६२ लाभार्थ्यांना कुसुंबा येथे थेट लाभ; ३०० घरकुल प्रलंबित प्रकरणेही मार्गी लागणार

*‘समाधान शिबिर’ ठरतेय जनतेसाठी दिलासादायी उपक्रम – पालकमंत्री गुलाबराव पाटील*

८६२ लाभार्थ्यांना कुसुंबा येथे थेट लाभ; ३०० घरकुल प्रलंबित प्रकरणेही मार्गी लागणार

*कुसुंबा /जळगाव/पाळधी (प्रतिनिधी) दि. २२ मार्च : छत्रपती शिवाजी महाराजांच्या नावाने सुरू करण्यात आलेले हे शिबिर स्वराज्याचा विचार जनतेच्या दारी पोहोचवणारे एक जनआंदोलन असल्याचे प्रतिपादन पालकमंत्री गुलाबराव पाटील यांनी केले. शासनाच्या दारात जनतेने फिरू नये, तर सरकारच जनतेपर्यंत पोहोचावे या संकल्पनेतून हे शिबिर राबवले जात असून, जनतेचे समाधान हाच या उपक्रमाचा आत्मा असल्याचे त्यांनी सांगितले. कुसुंबा येथे यापूर्वी ३५० कुटुंबांना जागा सह घरकुलाचा लाभ देण्यात आला असून, उर्वरित ३०० लाभार्थ्यांचाही जागाच्या उताऱ्यांचा प्रस्ताव मंजूर करून त्यांचा प्रश्न मार्गी लावला जाईल, अशी ग्वाही पालकमंत्री गुलाबराव पाटील यांनी दिली.*

पालकमंत्री गुलाबराव पाटील पुढे म्हणाले की, या शिबिराच्या माध्यमातून महिला बचत गटांना कर्ज, रेशन कार्ड, सातबारा उतारे, संजय गांधी निराधार योजना, पीएम किसान अपडेट, कृषी व समाजकल्याण विभागाच्या विविध योजना अशा सर्व सेवा एकाच ठिकाणी उपलब्ध करून दिल्या जात आहेत. त्यामुळे सरकार तुमच्या सोबत उभे आहे. याचे हे जिवंत उदाहरण ठरत आहे. उजाड कुसुंबा आता उजाड राहणार नाही, तर विकास, ज्ञान आणि संधींचा उजेड येथे दिसेल, असा विश्वास व्यक्त करत त्यांनी जळगाव तालुक्यात सहा महिन्यांत २८ हेक्टर पडीक जमीन लागवडीखाली आणल्याची माहिती दिली.

शिरसोली सर्कल अंतर्गत कुसुंबा येथे आयोजित छत्रपती शिवाजी महाराज महाराजस्व समाधान शिबिराला नागरिकांचा उत्स्फूर्त प्रतिसाद मिळाला. या शिबिराचे उद्घाटन जिल्ह्याचे पालकमंत्री गुलाबराव पाटील यांच्या हस्ते दीपप्रज्वलन करून करण्यात आले. कार्यक्रमाची सुरुवात महाराष्ट्र गीताने झाली असून दीपस्तंभाच्या विद्यार्थ्यांनी प्रार्थना सादर करून वातावरण भक्तिमय केले. सूत्रसंचालन वरिष्ठ लिपिक मोनाली लंगरे यांनी केले, तर प्रास्ताविकात प्रांताधिकारी विनायक गोसावी यांनी शिबिराचे उद्दिष्ट व जनतेला होणारे फायदे स्पष्ट केले. कार्यक्रमाचे आभार शिरसोली सर्कलच्या सारिका दुर्गुळे यांनी मानले.

*यांची होती उपस्थिती*
यावेळी प्रांताधिकारी विनायक गोसावी, तहसीलदार शीतल राजपूत, नायब तहसीलदार प्राजक्ता केदार, तलाठी भावेश रोहीमारे, शिक्षक सेनेचे नरेंद्र सपकाळे, सरपंच मिनाबाई पाटील, भारती पाटील, प्रवीण पाटील, आकाश पाटील. किरण घुगे, प्रवीण परदेशी, माजी सभापती नंदलाल पाटील, तालुकाप्रमुख शिवराज पाटील, महिला बचत गटाच्या सीआरपी सोनाली पाटील, साधना पाटील, जितू पाटील यांच्यासह परिसरातील ग्रामस्थ व महसूल कर्मचारी मोठ्या संख्येने उपस्थित होते.

*८६२ लाभार्थ्यांना मिळाला लाभ*
शिबिरामध्ये विविध शासकीय योजनांचा लाभ मोठ्या प्रमाणावर नागरिकांना देण्यात आला. यामध्ये ३८ डोमिसाइल प्रमाणपत्रे, २०७ डिजिटल सातबारा, ४२ सातबारा दुरुस्ती, १०७ जात प्रमाणपत्रे, १९ संजय गांधी योजनेअंतर्गत लाभ, ६३ जिवंत सातबारा व वारस नोंदी, ६० पोटखराब प्रकरणे, १८९ उत्पन्न दाखले तसेच १९ घरकुल लाभार्थ्यांना मंजुरी देण्यात आली. याशिवाय ६० फार्मर आयडी, १७ कृषी लाभार्थी, २१ वैद्यकीय सुविधा लाभार्थी तसेच ९ ट्रॅक्टर व कृषी यंत्रांचे वाटप करण्यात आले. महिला बचत गटातील ११ लाभार्थ्यांना एकूण १ कोटी १३ लाख रुपयांचे धनादेश वितरित करण्यात आले असून एकूण ८६२ लाभार्थ्यांना या शिबिरातून थेट लाभ मिळाला. शिबिराच्या ठिकाणी विविध प्रशासकीय विभागांचे माहितीपर प्रदर्शनीय स्टॉल उभारण्यात आले होते. सुमारे ९०० ते ९५० नागरिकांची उपस्थिती नोंदवण्यात आली असून या उपक्रमाच्या माध्यमातून शासकीय सेवा थेट गावपातळीवर पोहोचवण्याचा प्रभावी प्रयत्न यशस्वी झाल्याचे चित्र दिसून आले.