🔥*शेवटचा हक्काचा मतदार मॅप होईपर्यंत शांत बसू नका – पालकमंत्री गुलाबराव पाटील*🔥 मतदार यादी शुद्धीकरणात 100% यश मिळवण्यासाठी शिवसेनेकडून बीएलए प्रशिक्षण

*शेवटचा हक्काचा मतदार मॅप होईपर्यंत शांत बसू नका – पालकमंत्री गुलाबराव पाटील*

मतदार यादी शुद्धीकरणात 100% यश मिळवण्यासाठी शिवसेनेकडून बीएलए प्रशिक्षण

*जळगाव, दि. १० एप्रिल (प्रतिनिधी) : मतदार यादी शुद्धीकरण हे निवडणुकीच्या विजयाचे भक्कम अधिष्ठान असून “मतदार यादी म्हणजे निवडणुकीचा पाया आहे. हा पाया मजबूत असेल तर विजयाची इमारत आपोआप उभी राहते. त्यामुळे प्रत्येक मतदार तपासून, प्रत्येक बूथ मजबूत करण्याचा निर्धार करा. प्रत्येक बी.एल.ए.ने घराघरात जाऊन मतदारांची अचूक पडताळणी करावी, BLO सोबत सतत संपर्क ठेवावा आणि बोगस मतदारांना हद्दपार करत हक्काचे मतदार सुरक्षित करावेत. जोपर्यंत शेवटचा मतदार मॅप होत नाही, तोपर्यंत शांत बसू नका. आगामी स्थानिक स्वराज्य संस्थांच्या निवडणुका या कार्यकर्त्यांच्या आहेत. त्यामुळे प्रत्येकाने मैदानात उतरून संघटना बळकट करावी,” असे ठाम आवाहन पाणीपुरवठा व स्वच्छता मंत्री तथा पालकमंत्री गुलाबराव पाटील यांनी केले.*

जळगाव येथील केमिस्ट भवन येथे आयोजित मतदार यादी शुद्धीकरण (SIR) अभियानांतर्गत बी.एल.ए. प्रशिक्षण शिबिरात ते बोलत होते. यावेळी कामात कुचराई करणाऱ्यांना त्यांनी कान पिचक्या देत जबाबदारीची जाणीव करून दिली, तसेच प्रत्येक बी.एल.ए.ला मानधन देण्यात येणार असल्याची घोषणाही केली.

जळगाव ग्रामीण मतदारसंघात एकूण ३५३ बूथ असून ३ लाख ४४ हजार ७९१ मतदार आहेत. त्यापैकी २ लाख ५२ हजार १२१ (७३ टक्के) मतदारांचे मॅपिंग पूर्ण झाले असून उर्वरित ९२ हजार ६८० (२६.८८ टक्के) मतदारांचे मॅपिंग बाकी आहे. उर्वरित मतदारांचे मॅपिंग पूर्ण करण्यासाठी शिवसेनेकडून जोरदार मोहीम राबविण्यात येत आहे.

प्रास्ताविकात जिल्हा परिषद सदस्य प्रतापराव पाटील यांनी SIR अभियानाचे महत्त्व अधोरेखित करत हे अभियान १०० टक्के यशस्वी करण्याचे आवाहन केले. SIR तज्ञ प्रथमेश मोहोळ यांनी उपस्थित बी.एल.ए.ना सविस्तर मार्गदर्शन करून प्रभावी सादरीकरण केले.

*यांची होती उपस्थिती*
या प्रशिक्षण शिबिराला जिल्हा प्रमुख विष्णू भंगाळे, उपजिल्हाप्रमुख अनिल भोळे, रवी कापडणे, तालुका प्रमुख शिवराज पाटील, जिल्हा परिषद सदस्य प्रतापराव पाटील, पवन सोनवणे, युवा सेनेचे रोहित कोगटा, शिक्षक सेनेचे जिल्हाप्रमुख नरेंद्र सपकाळे, महानगरप्रमुख व नगरसेवक गणेश सोनवणे, श्याम कोगटा, कुंदन काळे, हर्षल मावळे, माजी सभापती राजेंद्र चव्हाण, नंदलाल पाटील, डॉ. कमलाकर पाटील, जितेंद्र पाटील, दूध संघाचे संचालक रमेशआप्पा पाटील, जनाआप्पा कोळी यांच्यासह शिवसेना व युवसेनेचे पदाधिकारी आणि बी.एल.ए. मोठ्या संख्येने उपस्थित होते.

सूत्रसंचालन उपतालुका प्रमुख संदीप सुरळकर यांनी केले, तर आभार तालुका प्रमुख शिवराज पाटील यांनी मानले.