वृद्ध आजींच्या अश्रूंना मिळाला माणुसकीचा आधार
मोतीबिंदू शस्त्रक्रियेसाठी आलेल्या महिलेला प्रशांतभाऊ झंवर यांची मदत; संवेदनशीलतेच्या कृतीने परिसर भारावला
पाळधी, प्रतिनिधी :
आजच्या धावपळीच्या आणि स्वार्थी होत चाललेल्या समाजात अनेकदा माणुसकी हरवत चालल्याची भावना व्यक्त केली जाते. मात्र काही व्यक्ती आपल्या कृतीतून समाजात अजूनही संवेदना आणि आपुलकी जिवंत असल्याचे दाखवून देतात. अशीच हृदयस्पर्शी घटना पाळधी येथे घडली असून, युवा सामाजिक कार्यकर्ते प्रशांतभाऊ झंवर यांनी एका वृद्ध महिलेला दिलेल्या मदतीमुळे परिसरात त्यांच्या कार्याचे कौतुक होत आहे.
भादली येथील एक वृद्ध महिला मोतीबिंदू शस्त्रक्रियेसाठी मोठ्या आशेने शिबिरात दाखल झाली होती. अत्यंत हलाखीची परिस्थिती असलेल्या या महिलेकडे प्रवासासाठीही पुरेसे पैसे नव्हते. गावातून लोकांकडून उसने पैसे घेऊन आणि जेमतेम भाड्याची व्यवस्था करून त्या शिबिरस्थळी पोहोचल्या होत्या. डोळ्यांवर उपचार झाल्यास पुन्हा नीट दिसू लागेल, या आशेने त्या आल्या होत्या.
मात्र काही कारणांमुळे त्यांना शिबिरस्थळी पोहोचण्यास उशीर झाला आणि त्या दिवशीची मोतीबिंदू शस्त्रक्रिया प्रक्रिया पूर्ण झाल्याने त्यांचा नंबर लागू शकला नाही. ही माहिती मिळताच वृद्ध महिलेला मोठा मानसिक धक्का बसला. आधीच आर्थिक अडचणी, त्यात उपचार राहिल्याची खंत आणि परत घरी जाण्याची चिंता यामुळे त्या अक्षरशः रडू लागल्या. त्यांच्या डोळ्यांतून वाहणारे अश्रू आणि चेहऱ्यावर दिसणारी असहाय्यता पाहून अनेकांचे मन हेलावले.
याचवेळी तेथे उपस्थित असलेल्या प्रशांतभाऊ झंवर यांनी या परिस्थितीकडे संवेदनशीलतेने पाहत तत्काळ पुढाकार घेतला. त्यांनी सर्वप्रथम त्या आजींना धीर दिला. शांतपणे त्यांची विचारपूस करत त्यांना पाणी पाजले आणि मानसिक आधार दिला. “काळजी करू नका, आपण पुन्हा ऑपरेशनसाठी येऊ,” असे सांगत त्यांनी आजींना दिलासा दिला.
यानंतर प्रशांतभाऊंनी स्वतःच्या खिशातून त्या महिलेला परतीच्या प्रवासासाठी आर्थिक मदत केली. एवढ्यावरच ते थांबले नाहीत, तर कडक उन्हामुळे आणि वृद्धापकाळामुळे आजींना चालणे कठीण जात असल्याचे पाहून त्यांनी स्वतः त्यांना बसस्थानकापर्यंत सोबत नेले. जळगावकडे जाणाऱ्या बसमध्ये सुरक्षितपणे बसवून त्यांच्या प्रवासाची खात्री करून घेतली.
या संपूर्ण प्रसंगाने उपस्थित नागरिकही भावूक झाले. अनेकांनी प्रशांतभाऊ झंवर यांच्या संवेदनशीलतेचे आणि सामाजिक बांधिलकीचे कौतुक केले. समाजसेवा म्हणजे केवळ प्रसिद्धी किंवा कार्यक्रम नव्हे, तर गरजवंतांच्या अडचणीच्या वेळी त्यांच्यासोबत उभे राहणे, हे प्रशांतभाऊंनी आपल्या कृतीतून दाखवून दिल्याची भावना नागरिकांनी व्यक्त केली.
दरम्यान, संबंधित वृद्ध महिलेच्या मोतीबिंदू शस्त्रक्रियेसाठी पुढील शिबिरात प्राधान्याने व्यवस्था करण्यात येणार असल्याची माहितीही यावेळी देण्यात आली. त्यामुळे त्या महिलेलाही मोठा दिलासा मिळाला आहे.
सामाजिक कार्य करताना माणुसकीची जपणूक किती महत्त्वाची असते, याचा प्रत्यय या घटनेतून आला. एका वृद्ध महिलेच्या डोळ्यांतील अश्रू पुसत तिला दिलेला आधार हा केवळ मदतीचा प्रसंग नसून समाजासाठी प्रेरणादायी संदेश ठरत आहे. प्रशांतभाऊ झंवर यांच्या या कार्यामुळे परिसरात त्यांच्या विषयी आदराची भावना अधिक दृढ झाली आहे.
