Wednesday, June 10

जळगाव जिल्हा

🌧️वादळी पाऊस व वाऱ्यामुळे झालेल्या शेती नुकसानीचे तात्काळ पंचनामे करा – पालकमंत्री गुलाबराव पाटील यांचे जिल्हा प्रशासनाला निर्देश !🌧️

By संपादक : प्रशांत झवर | आबा माळीJune 7, 2026No Comments2 Mins Read

{*वादळी पाऊस व वाऱ्यामुळे झालेल्या शेती नुकसानीचे तात्काळ पंचनामे करा – पालकमंत्री गुलाबराव पाटील यांचे जिल्हा प्रशासनाला निर्देश !*
पाळधी/जळगाव प्रतिनिधी | दि. ७ जून – जळगाव जिल्ह्यात मागील काही दिवसांत झालेल्या वादळी वाऱ्यासह मुसळधार पावसामुळे मुक्ताईनगर तालुक्यातील अंतुर्ली परिसर, रावेर तालुक्यातील अनेक गावे तसेच जिल्ह्यातील विविध भागांमध्ये केळीसह इतर पिकांचे मोठ्या प्रमाणावर नुकसान झाल्याची माहिती समोर आली आहे.
*या पार्श्वभूमीवर राज्याचे पाणीपुरवठा व स्वच्छता मंत्री तथा जिल्ह्याचे पालकमंत्री गुलाबराव पाटील यांनी जिल्हाधिकारी रोहन घुगे तसेच जिल्हा अधीक्षक कृषी अधिकारी कुरबान तडवी यांच्याशी तात्काळ संपर्क साधून नुकसानग्रस्त भागांमध्ये युद्धपातळीवर पंचनामे करण्याचे निर्देश दिले आहेत.*
मुक्ताईनगरचे आमदार चंद्रकांत पाटील यांनी अंतुर्ली परिसरातील शेतकऱ्यांच्या बांधावर जाऊन प्रत्यक्ष पाहणी केली असून त्यांनी नुकसानग्रस्त शेतकऱ्यांच्या व्यथा जाणून घेतल्या आहेत. आमदार चंद्रकांत पाटील यांनी पालकमंत्री गुलाबराव पाटील यांच्याशी दूरध्वनीवरून सविस्तर चर्चा करून नुकसानीची माहिती दिली.
*यानंतर पालकमंत्र्यांनी प्रशासनाला कोणत्याही शेतकऱ्यावर अन्याय होणार नाही याची दक्षता घेण्याच्या सूचना दिल्या आहेत. शेतकऱ्यांचे झालेले नुकसान पाहता शासन शेतकऱ्यांच्या पाठीशी खंबीरपणे उभे आहे. जिल्ह्यात ज्या-ज्या भागांमध्ये केळीसह इतर पिकांचे नुकसान झाले असेल, त्या सर्व ठिकाणी तातडीने पंचनामे करून अहवाल शासनाकडे सादर करण्यात यावा. कोणताही पात्र शेतकरी मदतीपासून वंचित राहणार नाही, याची काळजी घ्यावी. तसेच “संकटाच्या या काळात शासन आणि जिल्हा प्रशासन तुमच्या सोबत आहे. प्रत्येक नुकसानग्रस्त शेतकऱ्याला न्याय मिळवून देण्यासाठी आम्ही कटिबद्ध आहोत. असे पालकमंत्री गुलाबराव पाटील यांनी सांगितले.*
*शेतकरी बांधवांना पालकमंत्र्यांचे आवाहन*
जिल्ह्यातील ज्या शेतकऱ्यांच्या शेतीचे व पिकांचे नुकसान झाले आहे, त्यांनी घाबरून जाऊ नये. संबंधित तलाठी, कृषी सहाय्यक, मंडळ अधिकारी किंवा ग्रामस्तरीय यंत्रणेशी संपर्क साधून नुकसानीची माहिती द्यावी. प्रशासनाकडून तात्काळ पंचनामे करून शासनाच्या निकषानुसार मदत मिळवून देण्यासाठी आवश्यक कार्यवाही करण्यात येईल, असे आवाहन पालकमंत्री गुलाबराव पाटील यांनी केले आहे.

संपादक : प्रशांत झवर | आबा माळी

बातम्या आणि जाहिरातींसाठी संपर्क : 8999349004 | 7020387330

Leave A Reply