💥काळ आला होता, पण वेळ आली नव्हती – दीड वर्षाच्या पियुषसह दोन चिमुकल्यांचे प्राण थोडक्यात वाचले; *आगीत संसार उद्ध्वस्त झालेल्या कोळी कुटुंबाला पालकमंत्री गुलाबराव पाटील यांचा मायेचा आधार*💥

काळ आला होता, पण वेळ आली नव्हती –
दीड वर्षाच्या पियुषसह दोन चिमुकल्यांचे प्राण थोडक्यात वाचले; *आगीत संसार उद्ध्वस्त झालेल्या कोळी कुटुंबाला पालकमंत्री गुलाबराव पाटील यांचा मायेचा आधार*

*भोलाणे/ जळगाव, प्रतिनिधी.दि. १३ : आज सकाळी “घर जळाले… संसार जळाला… पण देवाने लेकरांना वाचवले!” या भावनेने डोळ्यांत अश्रू आणि मनात कृतज्ञतेची भावना घेऊन भोलाणे येथील गोपाळ नारायण कोळी आणि योगेश नारायण कोळी हे दोन हातमजुरी करणारे सख्खे भाऊ आज पालकमंत्री गुलाबराव पाटील यांच्यासमोर उभे होते.*

आज सकाळी अचानक लागलेल्या भीषण आगीत या दोन्ही भावांचे पत्र्याचे घर काही क्षणांत आगीच्या भक्ष्यस्थानी पडले. घरातील बचत गटाचे घेतलेले कर्ज, रोख रक्कम, काही दिवसांपूर्वीच घेतलेला फ्रीज, टीव्ही तसेच संसारोपयोगी सर्व साहित्य जळून खाक झाले. जवळपास दोन ते तीन लाखापेक्षा जास्त रुपयांचे नुकसान झाल्याचा अंदाज व्यक्त करण्यात येत असून, या दुर्घटनेमुळे संपूर्ण कुटुंब अक्षरशः रस्त्यावर आले आहे.

घटनेची माहिती सामाजिक कार्यकर्ते तुषार महाजन व सरपंच नितीन सुरेश कोळी यांनी पालकमंत्री गुलाबराव पाटील व युवा नेते तत्कालीन जिल्हा परिषद सदस्य प्रतापराव पाटील यांना दिली. माहिती मिळताच पालकमंत्री स्वतः घटनास्थळी दाखल झाले. त्यांनी पीडित कुटुंबाची आस्थेने विचारपूस केली, त्यांना धीर दिला आणि तातडीने मदतीचा हात पुढे केला.

*”घरकुल होईल तेव्हा होईल, पण पावसाळ्यात तुम्ही बेघर राहणार नाही!”*

पालकमंत्री गुलाबराव पाटील यांनी कोळी कुटुंबाला दिलासा देताना सांगितले की,
“शासनाच्या घरकुल योजनेतून कायमस्वरूपी घर मिळेल तेव्हा मिळेल; पण त्याची वाट पाहत बसायचे नाही. पावसाळ्यापूर्वी नवीन तंत्रज्ञानाच्या माध्यमातून तात्पुरत्या स्वरूपाचे सुरक्षित घर तुम्हाला मी उभारून दिले जाईल. तीन दिवसांत घराच्या कामाला सुरुवात केली जाईल आणि पावसाळ्यात तुम्हाला उघड्यावर राहावे लागणार नाही.”.l पालकमंत्र्यांच्या या शब्दांनी संपूर्ण कुटुंबाला मोठा मानसिक आधार मिळाला. यावेळी पालकमंत्री गुलाबराव पाटील यांनी कुटुंबाला रोख आर्थिक मदतही केली. तसेच दोन ते तीन महिने पुरेल एवढा किराणा, अंथरूण-पांघरूण, गाद्या, कपडे, गॅस, भांडी आणि संसाराला आवश्यक असणाऱ्या सर्व अत्यावश्यक वस्तू जि. प. सदस्य प्रतापराव पाटील यांनी तात्काळ उपलब्ध करून दिल्या.

*दीड वर्षाचा पियुष वाचला… आणि सर्वांनी सुटकेचा निःश्वास टाकला*
या घटनेतील सर्वात हृदयस्पर्शी आणि अंगावर शहारे आणणारी बाब म्हणजे गोपाळ नारायण कोळी यांचा दीड वर्षाचा मुलगा पियुष आणि त्याच्यासोबत पाच वर्षांचा दुसरा चिमुकला मुलगा हे दोघे नेहमी घरातच असायचे. आई-वडील शेतात गेल्यानंतर दीड वर्षाचा पियुष घरातील झोक्यात राहायचा.
मात्र आज सकाळी नियतीने वेगळाच निर्णय घेतला होता. मोठ्या आईने दोन्ही मुलांना सोबत शेतात नेले आणि काही वेळातच घराला आग लागली. आगीचे स्वरूप इतके भीषण होते की, घरात एखादी व्यक्ती जरी अडकली असती तरी तिला वाचवण्यासाठी कोणीही धाडस करू शकले नसते, अशी परिस्थिती निर्माण झाली होती.

घरासमोर उभे राहून जळालेल्या संसाराकडे पाहणाऱ्या ग्रामस्थांच्या तोंडून एकच वाक्य बाहेर पडत होते—
“काळ आला होता, पण वेळ आली नव्हती!”
परमेश्वराच्या कृपेने दोन निष्पाप चिमुकल्यांचे प्राण वाचले आणि एका मोठ्या अनर्थापासून हे कुटुंब बचावले.

पालकमंत्र्यांच्या मदतीने पुन्हा उभारी
अचानक आलेल्या या संकटामुळे कोळी कुटुंब पूर्णपणे खचून गेले होते. मात्र पालकमंत्री गुलाबराव पाटील यांनी स्वतः घटनास्थळी येऊन दिलेला धीर, तातडीची आर्थिक व जीवनावश्यक मदत आणि पावसाळ्यापूर्वी नवीन घर उभारून देण्याची दिलेली ग्वाही यामुळे या कुटुंबाला नव्याने जगण्याची आशा मिळाली आहे.

यावेळी सामाजिक कार्यकर्ते तुषार महाजन, सरपंच नितीन सुरेश कोळी, उपसरपंच सुरेखा समाधान कोळी, ग्रामपंचायत सदस्य योगेश कोळी, माजी सरपंच नाना कोळी, शिक्षक सेनेचे जिल्हाध्यक्ष नरेंद्र सपकाळे, कुटुंबप्रमुख योगेश कोळी, गोपाळ कोळी यांच्यासह त्यांचे संपूर्ण कुटुंब आणि ग्रामस्थ मोठ्या संख्येने उपस्थित होते.

जळालेला संसार पाहून डोळे पाणावले; पण दोन चिमुकल्यांचे प्राण वाचल्याचा आनंद आणि पालकमंत्र्यांच्या मदतीचा हात यामुळे कोळी कुटुंब पुन्हा उभे राहण्याच्या आशेने नव्या आयुष्याकडे पाहू लागले आहे.