💥*जलसुरक्षित भविष्यासाठी जलसंधारणाचा संकल्प आवश्यक – मंत्री गुलाबराव पाटील*💥 जागतिक जल दिनानिमित्त किनोद येथे पाणीपुरवठा योजनेचा जल अर्पण सोहळा; ग्रामपंचायतीकडे योजना हस्तांतरित

*जलसुरक्षित भविष्यासाठी जलसंधारणाचा संकल्प आवश्यक – मंत्री गुलाबराव पाटील*

जागतिक जल दिनानिमित्त किनोद येथे पाणीपुरवठा योजनेचा जल अर्पण सोहळा; ग्रामपंचायतीकडे योजना हस्तांतरित

*जळगाव प्रतिनिधी | दि. २२ मार्च – पाण्याचे महत्त्व अधोरेखित करत “पाणी हे निसर्गाचे अमूल्य वरदान असून त्याचे संवर्धन करणे ही प्रत्येकाची जबाबदारी आहे. गावाचा पाणी प्रश्न गावाने सोडवायचा हीच खरी लोकशाहीची ताकद आहे. ग्रामपंचायत आणि पाणी समितीच्या माध्यमातून योजना जपणे, टिकवणे आणि पुढील पिढ्यांसाठी सुरक्षित ठेवणे ही आपली सामूहिक जबाबदारी आहे असे प्रतिपादन राज्याचे पाणीपुरवठा व स्वच्छता मंत्री तथा पालकमंत्री गुलाबराव पाटील यांनी केले. जागतिक जल दिनाच्या औचित्याने तालुक्यातील किनोद येथे जलजीवन मिशन अंतर्गत पूर्ण झालेल्या पाणीपुरवठा योजनेचा “जल अर्पण” सोहळा त्यांच्या हस्ते मोठ्या उत्साहात पार पडला. त्यावेळी ते बोलत होते.*

पालकमंत्री गुलाबराव पाटील पुढे म्हणाले, “गावाची पाणी योजना ही पुढील पिढ्यांच्या भविष्याची हमी आहे. जलसंधारण, पाणी पुनर्वापर, जलसाक्षरता आणि जबाबदारीने पाण्याचा वापर या गोष्टी आज काळाची गरज आहेत. शासनाने जलजीवन मिशन, हर घर जल योजना, ग्रामीण पाणीपुरवठा प्रकल्प आणि स्वच्छ भारत अभियान यांसारख्या महत्वाकांक्षी योजना प्रभावीपणे राबविल्या असून यामुळे ग्रामीण भागात शुद्ध व सुरक्षित पाणी उपलब्ध होत असल्याने महिलांचे कष्ट कमी होत असल्याचे त्यांनी सांगितले. किनोद येथील पाणीपुरवठा योजना आजपासून ग्रामपंचायतीकडे हस्तांतरित करण्यात आली असून भविष्यात योजनेवर पुढे कोणतेही वीज बिल येणार नाही यासाठी सोलर बसविण्याची उपाय योजना करण्यात येईल असे त्यांनी नमूद केले. तसेच “जल अर्पण दिवस” या संकल्पनेमुळे पाणीपुरवठा योजनांची मालकी ग्रामपंचायत व स्थानिक समितीकडे देऊन लोकसहभाग वाढत असल्याचेही त्यांनी स्पष्ट केले.

जिल्हा परिषदेच्या मुख्य कार्यकारी अधिकारी मीनल करणवाल यांनी सांगितले की, पाणीपुरवठा योजना पूर्ण झाल्यामुळे महिलांना मोठा दिलासा मिळाला असून त्यांच्या दैनंदिन कष्टात लक्षणीय घट होत आहे. यामुळे गावातील जीवनमान उंचावण्यास निश्चितच मदत होईल.

*अंगणवाडी, शाळा व ग्रामपंचायतीला आयएसओ मानांकन*
यावेळी सरस्वती अंगणवाडी, ग्रामपंचायत व जिल्हा परिषद शाळेला आयएसओ मानांकन प्राप्त झाल्याबद्दल अंगणवाडी सेविका, शिक्षक व सरपंच-ग्रामसेवक यांचा पालकमंत्री गुलाबराव पाटील यांच्या हस्ते सत्कार करण्यात आला. कार्यक्रमाचे प्रास्ताविक उपविभागीय अभियंता वैभव कोळी यांनी करत जल दिनाचे महत्त्व व पाणीपुरवठा योजनेची माहिती दिली. सूत्रसंचालन उपशिक्षक कांतीलाल चौधरी यांनी केले तर आभार सरपंच उज्वला संदीप चौधरी यांनी मानले. कार्यक्रमाच्या शेवटी ग्रामस्थांनी “गावातील पाणीपुरवठा योजना चालविणे, देखभाल करणे व सुरक्षित ठेवणे” यासाठी सामूहिक शपथ घेतली.

*यांची होती उपस्थिती*
या कार्यक्रमास मुख्य कार्यकारी अधिकारी मीनल करणवाल, अधिक्षक अभियंता कृष्णा आव्हाड,
कार्यकारी अभियंता राहुल जाधव, गटविकास अधिकारी चंद्रकांत बोडरे, उपविभागीय अधिकारी वैभव कोळी, उपविभागीय अभियंता सुनील मोरे, उपविभागीय अभियंता राजेंद्र गिरी, कनिष्ट अभियंता हेमंत लाड , सायली वाडेकर, ऋषिकेश देशामुख निशिकांत चौधरी रोहन वनवे, सरपंच उज्वला चौधरी, माजी सभापती राजेंद्र चव्हाण, मच्छिंद्र पाटील, आशाबाई पाटील, वर्षाताई सपकाळे, शिवराज पाटील, गोपालजी भाऊ सावखेडा, जितू पाटील, गजानन सोनवणे, डॉ. कमलाकर पाटील यांच्यासह परिसरातील सरपंच, सदस्य, शिक्षक, अंगणवाडी सेविका व ग्रामस्थ मोठ्या संख्येने उपस्थित होते.