👁️जिपीएस मित्र परिवाराच्या भव्य नेत्र शिबिराला उत्स्फूर्त प्रतिसाद👁️ ४६० रुग्णांची नेत्रतपासणी; १७० रुग्णांची मोफत मोतिबिंदू शस्त्रक्रियेसाठी निवड

जिपीएस मित्र परिवाराच्या भव्य नेत्र शिबिराला उत्स्फूर्त प्रतिसाद

४६० रुग्णांची नेत्रतपासणी; १७० रुग्णांची मोफत मोतिबिंदू शस्त्रक्रियेसाठी निवड

पाळधी :
सामाजिक बांधिलकी जपत सर्वसामान्य नागरिकांना दर्जेदार आरोग्यसेवा उपलब्ध करून देण्याच्या उद्देशाने मा. ना. गुलाबराव पाटील यांच्या मार्गदर्शनाखाली तसेच जिल्हा परिषद सदस्य प्रतापराव पाटील व युवा उद्योजक विक्रम पाटील यांच्या पुढाकारातून जिपीएस मित्र परिवारातर्फे आयोजित करण्यात आलेल्या भव्य नेत्र तपासणी व मोफत मोतिबिंदू शस्त्रक्रिया शिबिराला रविवारी नागरिकांचा अभूतपूर्व प्रतिसाद लाभला.

पहाटेपासूनच शिबिरस्थळी नागरिकांनी मोठी गर्दी केली होती. सकाळी सात वाजल्यापासून नोंदणीला सुरुवात झाली. दिवसभरात एकूण ४६० रुग्णांची नेत्रतपासणी करण्यात आली. तज्ज्ञ डॉक्टरांच्या तपासणीनंतर १७० रुग्णांची मोतिबिंदू शस्त्रक्रियेसाठी निवड करण्यात आली असून, या सर्व रुग्णांना अत्याधुनिक सुविधा असलेल्या पनवेल येथील शंकरा नेत्र रुग्णालयात मोफत शस्त्रक्रियेसाठी पाठविण्यात आले.

शिबिरात रुग्णांच्या नोंदणीपासून नेत्रतपासणी, निदान, औषधोपचार, शस्त्रक्रियेसाठी निवड आणि पुढील उपचारांची संपूर्ण प्रक्रिया अत्यंत नियोजनबद्ध पद्धतीने पार पडली. ज्येष्ठ नागरिक व दिव्यांग रुग्णांसाठी स्वतंत्र व्यवस्था करण्यात आली होती. तसेच सर्व उपस्थितांसाठी नाश्ता व जेवणाची विनामूल्य सोय करण्यात आली. संपूर्ण सेवा पूर्णपणे मोफत उपलब्ध करून दिल्याने नागरिकांनी आयोजकांचे मनापासून कौतुक केले.

‘दृष्टीदान’ हा उपक्रम अनेक गरजू कुटुंबांसाठी आशेचा किरण ठरत असून, मोफत मोतिबिंदू शस्त्रक्रियेच्या माध्यमातून अनेकांना पुन्हा स्पष्ट दृष्टी मिळणार आहे. शिबिरातून लाभ घेतलेल्या रुग्णांनी आणि त्यांच्या नातेवाईकांनी गुलाबराव पाटील, प्रतापराव पाटील, विक्रम पाटील तसेच जिपीएस मित्र परिवाराचे आभार मानत या उपक्रमाचे भरभरून स्वागत केले.

हे शिबिर यशस्वी करण्यासाठी शंकरा नेत्र रुग्णालयाची तज्ज्ञ वैद्यकीय टीम, डॉ. राहुल चौधरी, डॉ. विजय ब्राम्हणे, डॉ. मोहसीन सय्यद, डॉ. गुरुनाथ घोटे, पाळधी व चांदसर प्राथमिक आरोग्य केंद्रातील कर्मचारी, तसेच जिपीएस मित्र परिवार, शिवसेना आणि युवासेनेचे पदाधिकारी व कार्यकर्त्यांनी दिवसभर अथक परिश्रम घेतले.

समाजहिताचे विविध उपक्रम सातत्याने राबविणाऱ्या मा. ना. गुलाबराव पाटील यांच्या नेतृत्वाखाली जिपीएस मित्र परिवाराने आरोग्यसेवेच्या क्षेत्रात उभा केलेला हा उपक्रम नागरिकांसाठी मोठा दिलासा ठरत आहे. जलपुरवठा क्षेत्रातील उल्लेखनीय कार्यामुळे “पाणीवाला बाबा” म्हणून ओळख निर्माण झालेल्या गुलाबराव पाटील यांची आता गरजू नागरिकांना डोळ्यांचे आरोग्य आणि नवदृष्टी देणारे “दृष्टी देणारे बाबा” अशीही नवी ओळख निर्माण होत असल्याच्या भावना शिबिराला उपस्थित नागरिकांनी व्यक्त केल्या.