💥*विठ्ठल रुक्मिणी मातेचे मंदिर हे गावाच्या एकोप्याचे अधिष्ठान” – पालकमंत्री गुलाबराव पाटील*💥 खर्दे येथे श्री विठ्ठल-रुक्मिणी मंदिर भूमिपूजन; मंदिर उभारणीस सर्वतोपरी सहकार्य, डीपीडीसीतून सभामंडप उभारण्याची ग्वाही

*विठ्ठल रुक्मिणी मातेचे मंदिर हे गावाच्या एकोप्याचे अधिष्ठान” – पालकमंत्री गुलाबराव पाटील*

खर्दे येथे श्री विठ्ठल-रुक्मिणी मंदिर भूमिपूजन; मंदिर उभारणीस सर्वतोपरी सहकार्य, डीपीडीसीतून सभामंडप उभारण्याची ग्वाही

*पाळधी / धरणगाव / जळगाव, दि. १२ जुलै (प्रतिनिधी) : “वारकरी संप्रदायाने महाराष्ट्राला भक्ती, समता आणि सेवाभावाचे अमूल्य संस्कार दिले आहेत. गावात उभे राहणारे विठ्ठल-रुक्मिणी मातेचे मंदिर हे केवळ श्रद्धेचे स्थान नसून गावाच्या एकोप्याचे, संस्कारांचे आणि सामाजिक ऐक्याचे अधिष्ठान असते. मंदिराभोवती माणसे जोडली जातात, मने जोडली जातात आणि गावाच्या विकासाची नवी दिशा निर्माण होते. त्यामुळे मतभेद असतील तर ते विसरून गावाच्या प्रगतीसाठी सर्वांनी एकदिलाने काम करावे असे भावनिक प्रतिपादन पाणीपुरवठा व स्वच्छता मंत्री तथा पालकमंत्री गुलाबराव पाटील यांनी केले.*

धरणगाव तालुक्यातील खर्दे येथे श्री विठ्ठल-रुक्मिणी मातेच्या मंदिराच्या भूमिपूजन सोहळ्यात ते बोलत होते.

यावेळी पालकमंत्री गुलाबराव पाटील म्हणाले, “खर्दे गावात विठ्ठल-रुक्मिणी मातेचे मंदिर नसल्याची बाब गावातील वारकरी मंडळी, सरपंच व पदाधिकाऱ्यांनी माझ्या निदर्शनास आणून दिली होती. या मंदिराच्या उभारणीसाठी माझे पूर्ण सहकार्य राहील. तसेच डीपीडीसीच्या माध्यमातून सभामंडप उभारणीसाठी आवश्यक निधी उपलब्ध करून देण्याचाही प्रयत्न केला जाईल,” अशी ग्वाही त्यांनी दिली.

*पालकमंत्र्यांचे असते हायस्कूलमध्ये वृक्षारोपण*
यावेळी पालकमंत्री गुलाबराव पाटील यांच्या हस्ते जय गुरुदेव माध्यमिक विद्यालय, येथे वृक्षारोपण करण्यात आले. पर्यावरण संवर्धन ही प्रत्येकाची सामूहिक जबाबदारी असून, भावी पिढीला हिरवागार व समृद्ध वारसा देण्यासाठी वृक्षलागवड आणि वृक्षसंवर्धनाची चळवळ लोकसहभागातून अधिक बळकट करण्याचे आवाहन त्यांनी यावेळी केले.

कार्यक्रमाच्या प्रास्ताविकात माजी तालुकाप्रमुख गजानन (नाना) पाटील यांनी पालकमंत्री गुलाबराव पाटील यांच्या वारकरी संप्रदायाविषयीच्या आस्थेचा, सामाजिक व धार्मिक कार्यातील योगदानाचा गौरव केला. कार्यक्रमाचे सूत्रसंचालन वाय. डी. पाटील सर यांनी केले, तर आभार सरपंच कैलास पाटील यांनी मानले.

*यांची होती उपस्थिती*
याप्रसंगी जिल्हा परिषद माजी उपाध्यक्ष जानकीराम पाटील, सरपंच कैलास पाटील, उपसरपंच योगेश पाटील, ह.भ.प. विकास महाराज, ग्रा.पं. सदस्य विजय पाटील, उमेश पाटील, वि.का. सोसायटीचे चेअरमन अनिल पाटील, मंगलाबाई बाविस्कर, प्रियंका कोळी, देविदास पाटील, विशाल पवार, माजी तालुकाप्रमुख गजानन पाटील, हायस्कूलचे चेअरमन वसंतराव भोलाणे, माजी सभापती दीपक सोनवणे यांच्यासह ग्रामस्थ व परिसरातील वारकरी, पदाधिकारी आणि भाविक मोठ्या संख्येने उपस्थित होते.